Ndege ya Air India aina ya Boeing 787-8 Dreamliner iliyokuwa imebeba watu 242 ilianguka mara tu baada ya kupaa kutoka uwanja wa ndege wa Ahmedabad. Ndege hiyo ilikuwa ikielekea London. Kulikuwa na abiria 232 na wahudumu 10, kwa mujibu wa taarifa ya Mamlaka ya Usafiri wa Anga ya India (DGCA).
Video ya ndege hiyo ikiruka kwa urefu wa chini na kushindwa kupata urefu wa kuridhisha inaonyesha ndege hiyo ikigonga ardhini na kulipuka kwa moto mkubwa saa 7:38 mchana.
Shirika la ndege la Air India katika taarifa yake limesema kuwa ndege namba AI 171, iliyokuwa ikifanya safari kutoka Ahmedabad kwenda London Gatwick, ilihusishwa katika tukio hilo leo.
“Kwa sasa, tunachunguza kwa kina undani wa tukio hili na tutatoa taarifa zaidi haraka iwezekanavyo,” Air India ilisema katika taarifa yake.
