Australia imetangaza hatua ya kumfukuza balozi wa Iran kufuatia tuhuma kuwa Tehran ilihusika moja kwa moja katika mashambulizi ya chuki dhidi ya jamii ya Kiyahudi yaliyotokea mwaka 2024 mjini Sydney na Melbourne.
Kwa mujibu wa Shirika la Ujasusi la Ndani la Australia (ASIO), uchunguzi wa kina umebaini kuwa kikosi cha Jeshi la Mapinduzi la Iran (IRGC) kilihusika katika kupanga na kufanikisha mashambulizi hayo, yaliyolenga mikusanyiko ya jamii ya Kiyahudi, ikiwemo mgahawa wa Lewis’ Continental Kitchen mjini Sydney mnamo Oktoba 20, na Adass Israel Synagogue mjini Melbourne mnamo Desemba 6.
Waziri Mkuu wa Australia, Anthony Albanese, alielezea mashambulizi hayo kama “ya hatari na ya kipekee,” na akaongeza kuwa yalikuwa yameandaliwa na taifa la kigeni lenye nia ovu ya kuvuruga mshikamano wa kitaifa na kuhatarisha usalama wa raia.
ASIO ilieleza kuwa IRGC ilitumia mtandao tata wa wadhamini na washirika kuficha ushiriki wa Iran katika mashambulizi hayo, hatua iliyolenga kukwepa lawama za moja kwa moja. Pamoja na hayo, maafisa wa ubalozi wa Iran nchini Australia wamekanusha kuhusika, wakisisitiza kuwa taifa lao halihusiani na vitendo vya kigaidi.
Katika hatua ya kisiasa, Bunge la Australia lipo mbioni kupitisha sheria ya kuorodhesha IRGC kama shirika la kigaidi, jambo ambalo litaifanya iwe haramu kwa mtu au taasisi yoyote nchini humo kushirikiana nao kwa namna yoyote ile.
Hatua ya Australia kufukuza balozi ni hatua kali ya kidiplomasia, na inaashiria mivutano inayozidi kuongezeka kati ya mataifa hayo mawili. Wachambuzi wa masuala ya usalama wa kimataifa wanasema hatua hii huenda ikaathiri uhusiano wa kibiashara na kidiplomasia baina ya Tehran na Canberra kwa muda mrefu ujao.
Australia imeahidi kuimarisha ulinzi wa maeneo ya ibada na taasisi za jamii ya Wayahudi, huku wito ukitolewa kwa jamii zote kuendelea kuishi kwa amani na kushirikiana katika kulinda usalama wa taifa.
