Ikulu ya Marekani (White House) imewekwa chini ya lockdown baada ya wanachama wawili wa U.S. National Guard kupigwa risasi katika eneo la Farragut West Metro Station, umbali wa maboma machache tu kutoka Ikulu. Tukio hilo lilitokea Jumatano na kusababisha tahadhari kubwa ya kiusalama jijini Washington, D.C.
Kwa mujibu wa taarifa za awali, wahanga ni askari kutoka West Virginia National Guard waliokuwa kwenye doria ya usalama mjini humo. Polisi wa Metropolitan pamoja na vikosi vya uokoaji waliwasili haraka eneo la tukio na kulifunga ili kuzuia madhara zaidi. Maafisa wamesema kuwa mshukiwa mmoja tayari amekamatwa, huku uchunguzi ukiendelea kubaini sababu za shambulio hilo.
Ripoti kutoka serikalini zinaeleza kuwa mmoja wa askari yuko katika hali mahututi, wakati mwenzake amejeruhiwa vibaya. Hata hivyo, kumekuwa na taarifa zinazotofautiana kuhusu kiwango cha majeraha yao, na mamlaka bado hazijatoa uthibitisho kamili kuhusu hali zao.
Wakati tukio linajiri, Rais Donald Trump hakuwepo Washington, alikuwa Palm Beach, Florida, lakini alipewa taarifa mara moja. Idara ya Usalama wa Ndani (DHS), Secret Service na FBI wanashirikiana kusimamia uchunguzi huku wakiongoza ulinzi mkali kwenye maeneo yanayozunguka White House.
Kwa muda mfupi, usafiri na biashara katika eneo hilo zilisimama, na hata uwanja wa ndege wa Ronald Reagan ulisimamisha baadhi ya safari zake kwa tahadhari.
Tukio hili limeibua mjadala mpya kuhusu usalama katika mji mkuu wa Marekani na nafasi ya National Guard katika majukumu ya ulinzi wa ndani, mjadala unaochochewa zaidi na tukio hili ambalo limeonesha udhaifu katika maeneo ambayo hutazamwa kama salama zaidi nchini humo.
