Polisi jijini Nairobi, Kenya wamefanikiwa kumkamata mshukiwa mmoja na kunasa kiasi kikubwa cha dawa za kulevya aina ya bangi pamoja na pombe haramu ya chang’aa, katika msako uliofanyika kwenye Barabara ya Jogoo.
Kwa mujibu wa taarifa iliyotolewa na maafisa wa polisi, operesheni hiyo ilifanyika kufuatia taarifa za kiintelijensia zilizopatikana kutoka kwa wananchi waliotoa ushirikiano. Katika msako huo, polisi walifanikiwa kukamata kilo 200 za bangi na lita 100 za chang’aa, bidhaa ambazo zilikuwa zimehifadhiwa kwa njia ya siri kwa lengo la kusambazwa katika maeneo mbalimbali ya jiji la Nairobi.
Mshukiwa mmoja alikamatwa katika eneo hilo na anatarajiwa kufikishwa mahakamani mara baada ya uchunguzi wa awali kukamilika. Polisi wamesema kuwa uchunguzi unaendelea ili kubaini mtandao mzima unaohusika na biashara hiyo haramu.
