Serikali ya Uingereza inajiandaa kuhamisha kati ya watoto 30 hadi 50 wa Kipalestina walioumia vibaya kutoka Gaza kwenda Uingereza kwa matibabu katika wiki zijazo. Watoto hao watateuliwa na Shirika la Afya Duniani (WHO) na watasafiri na ndugu zao kupitia nchi ya tatu ambako watapewa huduma za kibayometria.
Hatua hii inakuja baada ya wabunge 96 wa vyama mbalimbali kuiandikia serikali wakitaka watoto wagonjwa na majeruhi waingizwe Uingereza haraka kutokana na kuharibika kwa mfumo wa afya Gaza. Tayari baadhi ya watoto wameshawasili Uingereza kupitia mashirika binafsi, ingawa hii itakuwa mara ya kwanza kwa serikali kufanya hivyo rasmi.
Watoto hao watatibiwa kwenye hospitali za NHS, na huenda baadhi wakaingia kwenye mfumo wa hifadhi ya ukimbizi baada ya matibabu kutokana na ugumu wa kurudi Gaza. Tangu vita vianze Oktoba 2023, zaidi ya watoto 50,000 wameuawa au kujeruhiwa Gaza kwa mujibu wa UNICEF, huku vifo vya jumla vikifikia zaidi ya 60,000. Serikali ya Uingereza pia imekuwa ikisaidia kutibu majeruhi katika nchi jirani na kushirikiana na Jordan kupeleka misaada ya anga.
