Mwanaume aitwaye Henry Betsey Jr., mkazi wa jimbo la Florida, amehukumiwa kifungo cha miaka miwili jela baada ya kupatikana na hatia ya kuoa wanawake watatu tofauti kwa nyakati tofauti bila wao kufahamu kuhusu uwepo wa wenzi wengine, kinyume cha sheria za ndoa nchini Marekani.

Kwa mujibu wa taarifa kutoka ABC Action News, Henry alikiri mbele ya mahakama kwamba alifanya ndoa hizo kwa siri katika kaunti mbalimbali ndani ya jimbo la Florida. Alitumia ujanja huo ili kukwepa kugundulika na mamlaka za serikali pamoja na wake hao, akitumia majina na taarifa tofauti za utambulisho wakati wa kusajili ndoa hizo.

Taarifa zinaeleza kuwa Henry alitumia mwanya wa mifumo ya usajili ambayo haijaunganishwa kikamilifu baina ya kaunti hizo, jambo lililomuwezesha kusaini vyeti vya ndoa mara tatu tofauti bila kugundulika mara moja.

Kesi hii iligundulika baada ya mmoja wa wake zake kugundua uwepo wa ndoa nyingine kupitia mitandao ya kijamii. Uchunguzi wa kina uliofuata ulipelekea kufikishwa kwake mahakamani, ambapo alishtakiwa kwa kosa la bigamy (kuoa au kuolewa na watu zaidi ya mmoja wakati ndoa ya kwanza bado haijavunjwa).

Mahakama ilimkuta na hatia na kumhukumu kifungo cha miaka miwili jela, pamoja na agizo la kutohusiana tena na wake walioko kwenye ndoa hizo bila kibali rasmi cha kisheria.

Tukio hili limeibua mjadala mkubwa kuhusu usalama wa mifumo ya usajili wa ndoa na umuhimu wa kuwa na kanzidata ya pamoja ya kitaifa inayoweza kusaidia kubaini mienendo ya aina hii mapema kabla ya kuleta madhara kwa wahusika.

Henry Betsey Jr. sasa anakabiliwa pia na kesi za madai kutoka kwa wake hao, ambao wameeleza kusikitishwa na usaliti huo wa hali ya juu.