Mlipuko mkubwa wa ugonjwa wa kipindupindu umetokea katika jimbo la Bauchi, kaskazini mwa Nigeria, na kusababisha vifo vya watu 58 huku wengine zaidi ya 250 wakiripotiwa kuambukizwa. Taarifa hizo zimetolewa na Naibu Gavana wa jimbo hilo, Auwal Mohammed Jatau, ambaye amesema kuwa serikali ya jimbo imechukua hatua za dharura ili kudhibiti kuenea kwa maambukizi hayo hatari.

Katika taarifa kwa vyombo vya habari, Jatau amesema kuwa vikosi vya afya vimepelekwa katika maeneo yaliyoathirika zaidi ili kutoa matibabu ya haraka, elimu ya afya ya jamii na kuhakikisha upatikanaji wa maji safi na salama kwa wakazi.

Kwa mujibu wa takwimu kutoka Kituo cha Kitaifa cha Kudhibiti Magonjwa nchini Nigeria (NCDC), nchi hiyo imerekodi zaidi ya wagonjwa 11,000 wa kipindupindu katika kipindi cha miaka miwili iliyopita, ambapo zaidi ya watu 400 wamefariki dunia – wengi wao wakiwa watoto walio chini ya umri wa miaka mitano.

Wataalamu wa afya wanasema chanzo kikuu cha maambukizi haya ni ukosefu wa huduma bora za usafi wa mazingira, maji safi na uhifadhi salama wa vyakula, hasa katika maeneo ya vijijini na makazi duni.

Serikali imewaomba wananchi kushirikiana kwa karibu na wataalamu wa afya kwa kufuata maelekezo ya usafi, kuepuka kunywa maji yasiyochemshwa na kuripoti mara moja dalili za ugonjwa huo kama vile kuharisha maji maji, kutapika na udhaifu wa mwili.

Taarifa zaidi zinasubiriwa huku juhudi za kudhibiti mlipuko huo zikiendelea.