Mume amehukumiwa kifungo cha maisha jela kwa kosa la kumuua mkewe na kuficha mwili wake nyumbani kwao.
Richard Satchwell, mwenye umri wa miaka 58, alikana kumuua Tina Satchwell kati ya Machi 19 na Machi 20, 2017. Lakini Ijumaa iliyopita, majaji katika Mahakama Kuu ya Jinai mjini Dublin walitoa hukumu ya hatia kwa kauli moja baada ya kujadili kwa saa tisa na dakika 28, kwa mujibu wa Mail Online.
Katika kikao cha kutoa hukumu leo, familia ya marehemu ilimwelezea Tina kama mwanamke mpole na mwenye upendo kwa wanyama.
Binamu wa Tina, Sarah Howard, alisema aliuawa "na mtu aliyedai kuwa anampenda."
"Maumivu ya kumpoteza ni jambo nitakalobeba moyoni milele," aliongeza.
Mdogo wa Tina, Lorraine Howard, alizungumza kuhusu jinsi mwili wa Tina ulivyofukiwa ndani ya plastiki nyumbani kwao, akisema jambo hilo "hunipa mshtuko kila ninapolifikiria."
Aliongeza: "Sitawahi kuweza kumsamehe Richard Satchwell kwa kile alichokifanya."
Mahakama ilielezwa kuwa wenzi hao waliowana Uingereza siku ya kuzaliwa ya Tina alipofikisha miaka 20 kabla ya kuhamia Co Cork, kwanza Fermoy na baadaye kuhamia Youghal mwaka 2016.
Wakati wa kesi, ilielezwa kuwa Machi 24, 2017, Satchwell aliwaambia polisi kuwa Tina aliacha nyumba yao huko Youghal siku nne kabla kutokana na matatizo ya ndoa.
Alidai pia kuwa Tina alichukua €26,000 taslimu kutoka kwenye akiba waliyoiweka kwenye paa la nyumba, akiba ambayo mahakama iliambiwa haikuwepo.
Satchwell aliripoti rasmi kupotea kwa Tina mwezi Mei 2017 na alisema kwamba wakati mwingine Tina alikuwa na tabia ya kikatili kwake.
Katika miaka iliyofuata, alijitokeza kwenye vyombo vya habari mara kadhaa akielezea kuhusu asubuhi ambayo Tina aliondoka na hakurudi tena.
Mwili wake ulipopatikana mwezi Oktoba 2023, umezikwa chini ya sakafu ya saruji chini ya ngazi, mwanaume huyo wa miaka 58 alidai kuwa Tina "alimrukia" na chisel (aina ya kifaa cha kuchongerea).
Alisema alishikilia shingo yake ili kujilinda kabla hajakata pumzi. Majaji walikataa utetezi wake na wakampata na hatia ya mauaji.
Mwakilishi wake, Brendan Grehan SC, aliieleza mahakama kuwa Satchwell anakusudia kukata rufaa na kwamba "hakukusudia kumuua Tina."
