Wabunge wa Kenya wamekataa ombi la kuitaka serikali kupiga marufuku mtandao wa kijamii wa TikTok.
Kamati ya Bunge ya Kitaifa ya Malalamiko ya Umma, inayoongozwa na Mbunge wa Kitui Mashariki Nimrod Mbai, katika ripoti yake iliyowasilishwa Bungeni wiki hii, ilikataa ombi la Bob Ndolo, afisa mtendaji wa Bridget Connect, la kupiga marufuku jukwaa nchini Kenya.
"Kamati inakataa ombi hilo kwa sababu marufuku kamili ya TikTok haiwezi kutekelezeka kwani inakiuka haki za kimsingi na uhuru nchini." inasoma sehemu ya ripoti hiyo.
Bw Ndolo aliwasilisha ombi hilo Bungeni Agosti mwaka jana, akilaumu kwamba ingawa matumizi ya mtandao huo imewapa umaarufu miongoni mwa vijana wa Kenya, maudhui yaliyosambazwa jukwaani hayafai, yanakuza ghasia, maudhui ya ngono ya wazi, matamshi ya chuki, lugha chafu na tabia ya kuudhi, ambayo inaleta tishio kubwa kwa maadili ya kitamaduni na kidini.
