Katika tukio la kusisimua na kugusa hisia za wengi, mwanamke mmoja nchini Saudi Arabia, Noura Salem Al Shammari, amefanya kile wengi wanakiita tendo la kipekee la utu na huruma kwa kumpa figo yake mke mwenza wake.

Noura ni mke wa kwanza wa Majed Baldah Al Roqi, na aliamua kujitolea figo yake kwa mke mwenza wake ambaye alikuwa akisumbuliwa kwa muda mrefu na matatizo ya figo, hali iliyomlazimu kupitia mizunguko ya hemodialysis kila mara ili kuendelea kuishi. Baada ya kushuhudia mateso na uchovu mkubwa wa kiafya aliyokuwa akiyapitia mke mwenza wake, Noura aliona ni wajibu wake kusaidia – si kwa maneno, bali kwa kitendo halisi cha kumchangia figo.

Tukio hilo limechochea mazungumzo makubwa kwenye mitandao ya kijamii na katika jamii kwa ujumla, si tu nchini Saudi Arabia bali hata kimataifa. Watu wengi wameliona tendo hilo kama ishara ya mapenzi ya kweli, mshikamano, huruma ya hali ya juu na utu usio wa kawaida, hasa likizingatiwa linafanyika ndani ya ndoa ya wake wengi – ambapo kwa kawaida, jamii nyingi hutegemea kuwepo kwa ushindani, wivu na migogoro kati ya wake wenza.

Wengine wameeleza kuwa tukio hilo linatoa funzo la undugu wa kweli na linaweka mfano wa namna wanawake wanaweza kushikamana na kusaidiana hata katika mazingira magumu na ya kihisia.