Takriban wanajeshi 50 wameuawa katika shambulio la kigaidi lililotokea katika kambi ya kijeshi eneo la Dargo, kaskazini mwa Burkina Faso, siku ya Jumatatu.
Kwa mujibu wa vyanzo vya ndani, zaidi ya magaidi 100 walivamia kambi hiyo na kuua wanajeshi, kupora silaha na vifaa, kisha kuiunguza moto.
Kundi la kigaidi la Jama’at Nasr al-Islam wal-Muslimin (JNIM) linashukiwa kuhusika, ingawa jeshi halijatoa tamko rasmi. JNIM limehusika na mashambulizi mengi katika ukanda wa Sahel.
Burkina Faso inakabiliwa na changamoto kubwa za kiusalama, hasa vijijini, na tangu mwaka 2022, nchi hiyo imeshuhudia mapinduzi mawili ya kijeshi. Rais wa mpito Ibrahim Traoré anaendelea na jitihada za kurejesha utulivu licha ya vizingiti vingi.
Shambulio hili linaonyesha ukiukwaji mkubwa wa usalama unaowaathiri wanajeshi na raia katika eneo hilo lenye migogoro barani Afrika.
